Pərixanım Nəbi qızı Əliyeva
Bakı Slavyan Universiteti

SÖZ YARADICILIĞINDA İSİM DÜZƏLDƏN ŞƏKİLÇİLƏR

Açar sözlər: söz yaradıcılığı, leksik şəkilçilər, düzəltmə sözlər, isim
Key words: word creativity, lexical forms, correction words, noun
Kлючевые слова:словообразование, лексические аффиксы, сложные слова, существительное

Azərbaycan dili morfoloji quruluşuna görə dünyanın ən zəngin dillərindən biridir. Dilimizdə söz yaradıcılığı prosesi mühüm əhəmiyyət kəsb edir ki, dilin morfoloji sistemi də buna geniş imkan yaradır. Azərbaycan dili morfoloji xüsusiyyətlərinə görə aqlütinativ dillərdən olduğu üçün şəkilçilərin köməyi ilə yeni sözlərin yaranması və sözlərdə baş verən semantik proseslər dilimiz üçün mühüm əhəmiyyət kəsb edir. Ümumiyyətlə, şəkilçi morfemlər türk dilləri ailəsinə daxil olan hər bir dil üçün böyük əhəmiyyət daşıyır. Azərbaycan dilinin bu xüsusiyyətini nəzərə alan A.Axundov qeyd edir ki, “Aqlütinativ dillərə aqlütinativləşən, iltisaqi, şəkilçili, şəkilçiləşən dillər də deyilir. Bu dillərdə bütün leksik-qrammatik, yəni sözdüzəltmə (derivasiya) və qrammatik, yəni sözdəyişmə (relyasiya) əlaqələr, ilk növbədə, şəkilçi morfemlər vasitəsilə realizə olunur” (1, s. 192).