Aytəkin Əfqan qızı Tağıyeva
Azərbaycan Dövlət Pedaqoji Universiteti
Q.ZAKİR İRSİNİN TƏDRİSİNDƏ FƏNDAXİLİ ƏLAQƏNİN YARADILMASI
Açar sözlər: kurikulum, dərs, inteqrasiya, fəndaxili əlaqə, fəal təlim, interaktiv metod
Key words: curriculum, lesson,integration, intruder contact, active education, interactive method
Ключевые слова: куррикулум, урок, интеграция, злоумышленник контакт, активное обучение, интерактивный метод
Ədəbiyyat təliminə verilən müasir tələblər içərisində biliklərin interasiya zəmnində mənimsənilməsi məsələsi mühüm yer tutur. Müasir dövrdə bilik mənbələrinin sürətlə artdığı bir zamanda yalnız dərslikdəki bu və ya digər mövzu üzrə bilikləri əldə etməklə uğur qazanmaq mümkün düyil. Dərslərin yeni təlim texnologiyalarından istifadə yolu ilə qurulması və eyni zamanda inteqrativ təlim imkanlarının reallaşdırılması zəruri tələb kimi qarşıya qoyulur.
Bildiyimiz kimi son illərdə təhsil sahəsində bir sıra islahatlar aparılmışdır. Bütün bunlar dünya təhsil sisteminə inteqrasiya ilə əlaqədar olaraq baş vermişdir. Müasir təhsil sistemində inteqrativlik əsas prinsiplərdən hesab olunur. İnteqrativlik təhsilin məzmun komponenetlərinin bir-biri ilə və həyatla sistemli şəkildə əlaqələndirilməsidir. Ədəbiyyatın tədrisində inteqrativliyi təmin etmək baxımından fəndaxili və fənlərarası əlaqədən istifadə mühüm əhəmiyyət kəsb edir. Nəzərə almaq lazımdır ki, fəndaxili və fənlərarası əlaqələr sistemli şəkildə həyata keçirilsin. Çünki bu yolla şagirdlərdə yaradıcı düşüncə tərzini, müxtəlif mənbələrdən qazandıqları bilikləri əlaqələndirmək bacarığını formalaşdırmaq mümkündür.