Abdullah Erdəm
Azərbaycan Dövlət Pedaqoji Universiteti

AĞIR İNTELLEKTUAL ÇATIŞMAZLIĞI OLAN UŞAQLARIN TƏLİM-TƏRBİYƏ XÜSUSİYYƏTLƏRİ

Açar sözlər: intellektual çatışmazlıq, idrak fəaliyyəti, təlim-tərbiyə, korreksiya 
Key words: intellectual inadequacy, cognitive activity, training, education correction
Ключевые слова:интеллектуальная недостаточность, познавательная деятельность, обучение-воспитание, коррекция

Ənənəvi olaraq, intellektual çatışmazlıqlar baş beynin üzvü zədələnməsinin nəticəsi hesab olunur. Baş beynin fəaliyyətinin üzvü pozulmaları daha çox ağır əqli gerilikli uşaqlarda aşkar edilir. Yüngül və orta səviyyəli intellektual çatışmazlıqları olan uşaqlarda üzvü zədələnmələr çox nadir hallarda qeyd edilir. Bu o deməkdir ki, əqli geriliyin müxtəlif formalarının patogenezi birmənalı deyil, intellekt və baş beyin quruluşunun üzvü zədələnmələri arasındakı əlaqə hələ də tam açıqlanmamışdır.Əqli geriliyin aparıcı əlaməti ali psixi funksiyaların formalaşma pozulması kimi özünü göstərən idrak proseslərinin (duyğu, qavrayış, diqqət, hafizə, təfəkkür, təxəyyül, nitq) zəifliyi və ya deformasiyası, emosional-iradi sahə və motorikada kənara çıxmalar, bütövlükdə şəxsiyyətin formalaşmaması ilə ifadə olunmuş intellektual çatışmazlıqdır.