Əliyeva Ləman Mürşüd qızı
Azərbaycan Dövlət Pedaqoji Universiteti

AZƏRBAYCAN DİLİ DƏRSLƏRİNDƏ CÜMLƏ QURMAQ VƏRDİŞLƏRİNİN ÜSLUBİYYATLA ƏLAQƏSİ

Açar sözlər: üslubiyyət, cümlə, bədii üslub, təlim prosesi
Key words: style, sentence, art style, learning process
Ключевые слова:стиль, предложение, художественный стиль, учебный процесс

Məlumdur ki, qrammatika dilin quruluşunda əhəmiyyətli yerə sahibdir. Buna görə də orta məktəbdə şagirdlərə cümlə qurmaq vərdişlərinin aşılanması üçün sintaksisin əsas qaydalarını öyrənməyə və cümlənin üslubi cəhətdən aydın, dəqiq, ahəngdar qurulmasına diqqət yetirmək lazımdır.
Müəllim bu məsələnin izahına başlayarkən, əvvəlcə şagirdlərə izah etməlidir ki, cümlənin aydın və dəqiq olması üçün yalnız münasib sözləri seçmək kifayət deyildir; cümləni elə qurmaq lazımdır ki, hər bir oxucu cümləni dəqiq və düzgün anlaya bilsin. Ona görə də zəngin söz ehtiyatına sahib olmaq hələ cümlə qurmaq üçün hər şey deyil, əsas məsələ bu sözləri yerində işlədərək mükəmməl cümlə qurmaqdır.