Əbdülova Aygün Hüseynağa qızı
Azərbaycan Dövlət
Mədəniyyət və İncəsənət Universiteti
İNCƏSƏNƏT TƏMAYÜLLÜ ALİ MƏKTƏBLƏRDƏ LÜĞƏT ÜZƏRİNDƏ İŞ
Açar sözlər: lüğət, tərcümə, şifahi nitq, cümlə, terminoloji, leksik material, sual, sinonim, cümlədə söz sırası
Key words: vocabulary, translation, oral speech, sentence, terminological, lexical material, question, synonym, word order in a sentence
Ключевые слова: словарь, перевод, устная речь, предложение, терминологический, лексический материал, вопрос, синоним, порядок слов в предложении
Xarici dilin tədrisində lüğət təlimi zəruri elementlərdən biridir. Lüğət təlimi müasir təhsilin tələblərindən olan kommunikativ metodun inkişafında əhəmiyyətli rol oynayır. Xarici dilin tədrisində lüğəti qrammatikadan üstün tutaraq məşhur ingilis metodisti söyləmişdir ki, “qrammatikasız az da olsa fikir ifadə etmək olar, lüğətsiz isə heç bir şey ifadə edilə bilməz” (1, s.111-112). Digər alim isə leksikanın dilin özəyi olduğunu vurğulamışdır (2, s.89). Əlbəttə ki, mükəmməl nitq vərdişlərinə yiyələnməkdən ötrü lüğət təlimi ön planda olmalıdır.
Həm dərsdə, həm də dərsdən kənarda tələbələrin lüğətlə işini təmin etmək lazımdır. Tədris olunan müəyyən mövzulara aid lüğətin dərsliyin tərkibində tam şəkildə yerləşdirildiyinin qeyri-mümkün olduğunu nəzərə alaraq, orada verilən leksik materialdan başqa eyni mövzu üzrə tələbələrə əlavə sözlər vermək lazımdır. Sözləri və onların tərcüməsini tələbələrə əzbərlətməklə kifayətlənmək olmaz. Lüğət təlimində əsasən klassik metodlardan istifadə olunur.