Hazırda əhalinin heyvandarlıq məhsullarına artan tələbatını təmin etmək məqsədilə heyvanların cins tərkibinin yaxşılaşdırılması çox böyük əhəmiyyət kəsb edir. Lakin bir sıra xəstəliklər nəticəsində heyvanların baş sayı azalır, məhsuldarlıq aşağı düşür, təsərrüfatlara ciddi ziyan dəyir. 

Bunun səbəblərindən biri də kənd təsərrüfatı heyvanlarında maddələr mübadiləsinin pozulmasıdır. Bu qrup xəstəliklər bütün yoluxmayan xəstəliklərin 10%-dən çoxunu təşkil etməklə südçülük, kökəltmə təsərrüfatlarına çox böyük iqtisadi ziyan verir. Odur ki, kənd təsərrüfatı heyvanlarında maddələr mübadiləsinin pozğunluğu nəticəsində baş verən xəstəliklərin qarşısının vaxtında alınması vacib məsələdir. Maddələr mübadiləsi orqanizmdə vahid bir bioloji proses olsa da, əksərən zülal, sulu karbon, lipid, mineral maddələr və vitaminlər mübadiləsinin pozulması formasında gedir.