Məhərrəmova Xuraman İbniyəmin qızı
Azərbaycan Tibb Universiteti 

ORDUBAD ŞİVƏLƏRİNİN XÜSUSİYYƏTLƏRİ

Açar sözlər: şivə, lüğət, arxaizm, folklor örnəkləri, haxışta, bayatı, dil tarixi, müqayisə
Key words: accent, dictionary, archaism, folklore samples, hakhishta, bayats, language history, comparison
Ключевые слова: акцент, словарь, архаизм, образцы фольклора, баяты, языковая история, сравнение

Ümummilli Lider Heydər Əliyev çıxışlarında bölgələrimizin özünəməxsus danışıq xüsusiyyətlərinə çox gözəl münasibət bildirmişdir: "İhsan Doğramacının çox böyük xüsusiyyət¬ləri var. Məsələn, Azərbaycanda ləhcələr var - Bakı ləhcəsi, Naxçıvan ləhcəsi, Gəncə ləhcəsi, Qarabağ ləhcəsi, başqa yerin ləhcəsi... Bu ləhcələrin hamısını bilir. Bizim adamların çoxu bunu bilmir. Mən sizə deyim, mən dilçi deyiləm, linqvist deyiləm. Ancaq mən də, hər halda, bilgili adamam. Amma bunları mən də onun qədər bilmirəm. Bizim dilimiz birdir axı, türk dili, Azərbaycan dili eyni dildir" (1, 244).