Mahmudova Vusalə Valeh qızı
Azərbaycan Dövlət Pedaqoji Universiteti

QARŞILIQLI FƏALİYYƏT ŞƏRAİTİNDƏ MƏKTƏBƏQƏDƏR YAŞLI UŞAQLARIN SOSİAL-ŞƏXSİ İNKİŞAFI

Açar sözlər: məktəbəqədər, sosial, prinsip, şəxsi,uşaq
Key words: pre -school, social , principle, private,child
Ключевые слова: дошкольное, социальное, принципы, личностное, ребенок

Uşaqların sosial şəxsi inkişafı nə cür baş verir?
Bu istiqamətdə aparılan işlərin əksəriyyəti uşaqların uşaq bağçasında olduğu zaman ərzində aparılmışdır. 
Uşaqlarla iş səhər yığıncağından başlanır ki, bu zaman uşaqlarla emosional əlaqə yaradılır, söz ehtiyatı zənginləşdirilir, uşaqlara bir-biri ilə qarşılıqlı təsirdə olmaq öyrədilir, hər bir uşağa seçilən mövzu haqqında bildiklərini söyləmək imkanı verilir. Yığıncaq salamlaşma ilə başlanır. Salamlaşma zamanı uşaqlar bir-birini gördüyünə görə sevinc hissini və yaxud yoldaşlarından birinin gəlmədiyinə görə təəssüf hissini ifadə edirlər. Salamlaşma müxtəlif cür həyata keçirilə bilər, məsələn: müxtəlif dillərdə salamlaşma, musiqili salamlaşma, jestlərlə salamlaşma və s. Yığıncağın əsas elementlərindən biri də qarşılıqlı şəkildə komplimentlərin söylənilməsidir. Kompliment əhvalı qaldırır və bizi sonrakı fəaliyyətə stimullaşdırır.