Azərbaycan Tibb Universiteti

Terminologiya fondunun zənginləşdirilməsi və təkmilləşdirilməsi üçün ən əlverişli yol bu dilin öz lüğət tərkibi, öz daxili imkanları əsa­sın­da terminlərin yaradılmasıdır. Ona görə də elm və texnikanın müxtəlif sahələrində meydana gələn yeni anlayışların ifadəsi üçün terminlər yaradılarkən, birinci növbədə ana dilimizin daxili imkanlarından istifadə etmək lazımdır. Azərbaycan dili qədim və zəngin dillərdən biridir. Bu dil­də indiyədək elm və texnikanın, iqtisadiyyat və mədəniyyətin müxtəlif sa­hələrinə aid terminologiya formalaşmışdır. İnformatika terminlərinin ya­ranması üçün Azərbaycan dili hər cür zəngin imkanlara malikdir. Lakin bə­zən Azərbaycan dilində informatika terminlərinin yaradılmasını başqa dil­lərə, xüsusilə rus və ingilis dillərinə məxsus ayrı-ayrı terminlər üçün qar­şılıq müəyyənləşdirilməsi kimi başa düşürlər. S.A.Sadıqova yazır: “Be­lə bir yanlış təsəvvür nəticəsində indiyədək terminoloji lüğətlərdə cid­di nöqsanlara yol verilmişdir. Əslində isə terminlərin yaradılması hər bir dilin özünəməxsus olan  söz yaradıcılığı prosesidir” [13, s. 10].