Açar sözlər: Heydər Əliyev, Ömər Eldarov, heykəltaraşlıq, obraz, abidə
Key words: Heydar Aliyev, Omar Eldarov, sculpture, character, monument
Ключевые слова: Гейдар Алиев, Омар Эльдаров, скульптура, образ, памятник
Heykəltəraşlıq bütün digər sənət növləri içərisində gerçəkliyi ancaq maddiyyat müstəvisində ifadə etmək baxımından ruhdan ən çox uzaqlaşdırılmış bir sənətdir. Hegelin dediyi kimi, bu sənət qarşısında ruhu ağır materiyanın dili ilə təcəssüm etdirmək kimi çətin bir vəzifə dayanır. Hələ bu az imiş kimi, gerçək həyatdan zaman amili də götürülür və sənətkarın ixtiyarında ancaq bir an qalır. Bu maddi dünyanın dondurulmuş bir məqamı! Dayanmış zamanda nəinki ruhu ifadə etmək çox çətindir, bu halda həm də hərəkəti və dinamikanı təcəssüm etdirmək üçün vasitələr də yox dərəcəsindədir. Bu sənət həm ən monumental, həm də ən ləng, ən statik, ən ağır bir ifadə texnikasına əsaslanan sənətdir. Azərbaycan heykəltaraşlığı tarixində bir çox dahi heykəltaraş yetişmişdir. Onlardan biri də görkəmli sənətkar, Azərbaycan Respublikasının Xalq rəssamı, Azərbaycan Dövlət Rəssamlıq Akademiyasının rektoru Ömər Eldarovdur. Onun yaradıcılığını müşahidə edərkən sənət dühasının hüdudsuzluğunu, bədii təxəyyülünün bənzərsizliyini, ideyalarının bəşəriliyini, obrazlarının düşündürücülüyünü, dolğunluğunu, kamilliyini və s. incə məqamları xüsusilə qeyd etmək olar.