Şamaxı Astrofizika Rəsədxanası

Bakı Slavyan Universiteti

Hər 75-79 ildən bir uzaq səmanın ənginliklərindən Günəş və Yer ətrafına qayıdan Halley kometinin 1910-cu ildəki gəlişi zamanı onun Yer kürəsi ilə toqquşa bilmək ehtimalı ilə əlaqədar bütün dünya təşvişə düşmüşdü. Həmin dövrlərin şahidi Səid Nursinin “Sözlər”kitabının “Üçüncü söz”ündə [1] oxuyuruq: “...məşhur bir işıqlı ağıl sahibi deyilən qəlbsiz bir fasiq filosof isə göydə bir quyruqlu yıldız görsə, yerdə titrər. – Əcəba, bu sərsəri yıldız ərzimizə çarpmasınmı? – deyər, vəlvələyə düşər. Bir vaxt belə ulduzdan qoca Amerika titrədi. Çoxları gecə vaxtı evlərini tərk etdilər.” Qeyd etmək yerinə düşər ki, söz, sənət adamları da kometi vəsf etməkdə idi.