Azərbaycan Dövlət Rəssamlıq Akademiyası

Müasir dövr Azərbaycan rəngkarlığı keçmiş zamanın ənənələrini davam etdirməklə yanaşı, müasir dövrün tələblərini də özündə cəmləşdirə bilmişdir. Belə ki, müasir Azərbaycan rəngkarlığının inkişafında gənc rəssamların rolunu xüsusilə vurğulamaq lazımdır. Gənc rəssamların yaradıcılığına nəzər yetirdikdə, onların real təsvirlərlə yanaşı abstrakt, avanqard üslubların  xüsusiyyətlərinə də meyl etdiyini görürük.  Belə gənc rəssamlarımızdan biri də dəzgah rəngkarlığında uğurlar qazanan Xanlar Əsədullayevdir.

Xanlar Əsədullayev 1988-ci il dekabrın 9- da Siyəzən şəhərində anadan olmuşdur. O, 2003-2007- ci  illərdə ADRA – nın nəzdində  incəsənət kollecinin “İnteryer dizayner” ixtisasında təhsil almışdır . Daha sonra   2007-2011- ci illərdə Azərbaycan Dövlət Rəssamlıq Akademiyasında “Təsviri sənət” fakültəsinin “Rəngkarlıq” ixtisası üzrə təhsilini davam etdirmişdir.Gənc rəssam 2004 – cü ildən başlayaraq, müxtəlif beynəlxalq sərgi və dövlət tədbirlərində aktiv  iştirak etməyə başlamışdır. O, 2010- cu ildən etibarən isə Azərbaycan Rəssamlar ittifaqının “Gənc rəssamlar” bölməsinin üzvidir.