DOI: https://doi.org/10.36719/2789-6919/54/104-107
Fatimə Qəhrəmanova
Azərbaycan Dövlət İqtisad Universiteti
magistrant
https://orcid.org/0009-0000-5500-3469
fqehremanova57@gmail.com
Azərbaycanda elektron ticarətin bank sektoruna təsirinin təhlili
və qiymətləndirilməsi
Xülasə
Azərbaycanda elektron hökumətin və rəqəmsal iqtisadiyyatın inkişafı şəffaflığın artırılmasına, idarəetmədə səmərəliliyin artırılmasına və dövlət xidmətlərinə çıxışın asanlaşdırılmasına yönəlmiş strateji islahatların nəticəsidir. 2000-ci illərin əvvəllərindən etibarən dövlət idarəçiliyinin rəqəmsallaşdırılması və informasiya-kommunikasiya texnologiyalarının (İKT) bütün sahələrdə tətbiqi üçün geniş proqramlar həyata keçirilmişdir. “ASAN Xidmət” mərkəzlərinin yaradılması, elektron imza sistemlərinin və rəqəmsal ödəniş platformalarının tətbiqi vətəndaş məmnuniyyətini artırmış, bürokratik maneələri azaltmış və dövlət xidmətlərinin səmərəliliyini təmin etmişdir. “2022–2026-cı illər üçün Rəqəmsal İqtisadiyyat Strategiyası” süni intellekt, böyük verilənlər və blokçeyn texnologiyalarının idarəetmə və biznes proseslərinə inteqrasiyasını nəzərdə tutur. Bu keçid neftdən asılılığın azaldılmasına, startapların, kiçik və orta sahibkarlığın (KOBİ) inkişafına və innovasiya ekosisteminin formalaşmasına imkan verəcək.
Eyni zamanda, kibertəhlükəsizlik riskləri, şəhər və kənd yerləri arasında rəqəmsal bərabərsizlik və işçi qüvvəsinin rəqəmsal bacarıqlarının artırılması kimi məsələlər aktual olaraq qalır. Ümumilikdə, Azərbaycanın rəqəmsal transformasiyası davamlı sosial-iqtisadi inkişafın təmin edilməsinə və ölkəni 2030-cu ilə qədər regional rəqəmsal mərkəzə çevirmək məqsədinə xidmət edir.
Açar sözlər: elektron, rəqəmsal, idarəetmə, transformasiya, regional