DOI: https://doi.org/10.36719/2706-6185/49/59-63
Mirzağa Yaqubzadə
Bakı Dövlət Universiteti
doktorant
https://orcid.org/0009-0001-6350-2644
mirzaga.yaqubov@gmail.com
Hüquqi müəyyənlik prinsipinin təmin edilməsində vahid məhkəmə
təcrübəsinin rolu
Xülasə
Məqalədə müasir hüquqi dövlətlərin əsas təməl prinsiplərindən biri hesab edilən hüquqi müəyyənlik prinsipinin təmin edilməsində vahid məhkəmə təcrübəsinin rolu geniş şəkildə təhlil olunur. Hüquqi müəyyənlik məhkəmə qərarlarının sabit, qabaqcadan proqnozlaşdırıla bilən və məntiqli olmasını, oxşar hallarda müxtəlif nəticələrin qarşısının alınmasını tələb edir. Bu, məhkəmə sisteminə ictimai etimadı artırır və insan hüquqlarının səmərəli müdafiəsinə zəmin yaradır. Tədqiqatın məqsədi Azərbaycan Respublikasında vahid məhkəmə təcrübəsinin nəzəri və praktiki aspektlərini araşdırmaq, xüsusilə Ali Məhkəmənin Plenum qərarları və hüquqi izahlarının məhkəmə təcrübəsinin vahidliyinin təminindəki əhəmiyyətini qiymətləndirməkdir. Məqalədə milli qanunvericiliyin müvafiq müddəaları öyrənilir, məhkəmə təcrübəsində mövcud boşluqlar və ziddiyyətlər aşkarlanır və bunların hüquqi müəyyənlik prinsipinə təsiri analiz olunur. Eyni zamanda, Avropa İnsan Hüquqları Məhkəməsinin presedent hüququ praktikasına istinad edilərək beynəlxalq yanaşmanın milli səviyyədə tətbiq imkanları qiymətləndirilir. Tədqiqat normativ hüquqi aktların, məhkəmə qərarlarının və hüquqşünas alimlərin fikirlərinin müqayisəli təhlili əsasında aparılır. Məqalənin sonunda vahid məhkəmə təcrübəsinin inkişafı və qərarların ziddiyyətliliyinin aradan qaldırılması ilə bağlı praktiki təkliflər irəli sürülür.
Açar sözlər: hüquqi müəyyənlik, vahid məhkəmə təcrübəsi, Ali Məhkəmə Plenumu, presedent hüququ, insan hüquqlarının müdafiəsi