https://doi.org/10.36719/2706-6185/43/61-66
Aygün Əzimova
Bakı Dövlət Universiteti
filologiya üzrə fəlsəfə doktoru
aygunazim@mail.ru
https://orcid.org/0000-0002-8652-8249
AXC dövrü mətbuatı Şirməmməd Hüseynovun tədqiqatlarında
Xülasə
Müstəqillik qazanıldıqdan sonra mətbuat tarixinin yenidən tədqiqi və dövrün gerçəklərinə yeni baxış bucağından aydınlıq gətirilməsi bugünkü günümüzün vacib məsələlərindəndir. Məqalədə milli mənəvi irsimizin tədqiqatçısı Şirməmməd Hüseynovun Azərbaycan mətbuatının açılmamış səhifələrinə, tədqiqatlardan kənarda qalan mətbu orqanlara, yaradıcılığı az öyrənilən şəxsiyyətlərinə, sovet dövründə siyasi səbəblərdən üzərinə qadağa qoyulan faktlara, təhrif olunan hadisələrə, xüsusilə Azərbaycan Xalq Cümhuriyyəti dövrü ilə bağlı 1991-2018-ci illər araşdırmaları tədqiq və təhlil edilir.
Bu tədqiqatlardan aydın olur ki, Ş. Hüseynov faktlara, hadisələrə, problem və şəxsiyyətlərə azərbaycançılıq ideyasının prinsipləri əsasında qiymət vermişdir. Məqalədə alimin müxtəlif illərdə çap olunmuş elmi əsərlərinin təhlilindən aydın olur ki, o, AXC dövrünü birmənalı olaraq obyektiv istiqamətdə araşdırmışdır.
Ş. Hüseynovun “Azərbaycan” qəzetində Parlament hesabatları və şərhlər (noyabr 1918 ‒ aprel 1920)” adlı üçcildliyi ölkə daxilində gedən proseslərə münasibətləri, əks qüvvələrin maraqlarını öyrənmək, tariximizi obyektiv, sistemli, faktlar əsasında araşdırmaq baxımından dəyərli mənbə kimi qiymətləndirilir.
Məqalədə bu tədqiqatlarda alimin vətəndaşlıq mövqeyi də dəyərləndirilir, tədqiqatların aktuallığı xüsusi təhlil edilir.
Açar sözlər: Şirməmməd Hüseynov, tədqiqat, təhlil, mətbuat, demokratik, dövlət quruculuğu, istiqlal