DOI: https://doi.org/10.36719/2706-6185/63/61-65
Azərbaycanlı mühacirlərin Almaniyada fəaliyyəti:
Süleyman Təkinər
Vüqar Abdullayev 
Xülasə. Məqalədə Süleyman Təkinərin həyatı və yaradıcılığı haqqında məlumat verilmişdir. Azərbaycanlı legionerlərin İkinci Dünya müharibəsi illərində qorunması və müharibədən sonra Almaniyada yaşaması üçün şərait yaradanlardan biri də Süleyman Təkinər olmuşdur. Özü də legioner olan Təkinər legionun yaranmasında məqalələri ilə yaxından iştirak etmişdir. Məqalədə Almaniya Federal Arxivindən əldə edilən məlumatlara əsasən onun 1945–1946-cı illərdə ABŞ hərbi əsirliyində olması da qeyd edilir. Yaşadığı çətinliklərə baxmayaraq, Süleyman Təkinər vətənpərvər bir yazıçı kimi bütün məşəqqətlərə sinə gəlmişdir. Müəllif onun həyatı ilə yanaşı, ədəbi-tənqidi məqalələrindən də bəhs etmişdir. Süleyman Təkinərin Azərbaycan dilinin saflığı uğrunda yazdığı məqalələr və qürbətdə yaşamasına baxmayaraq ana dilinə bağlılığı xüsusi diqqət çəkir. Həmçinin onun Hüseyn Cavid, Cəlil Məmmədquluzadə və Sabir haqqında fikirlərinə yer verilmişdir. Tədqiqatçıların (N. Yaqublu, N. Cabbarlı, A. Tahirli) qeyd etdikləri kimi, Süleyman Təkinərin yaradıcılığı hələ tam tədqiq edilməmişdir. Məqalədə onun məhkumluq həyatı, keçdiyi çətin yol, mühacirlik fəaliyyəti və Azərbaycan ədəbi tənqidindəki rolu araşdırılmışdır.
Açar sözlər: Süleyman Təkinər, ədəbi tənqid, ədəbiyyatşünaslıq, Azərbaycanlı mühacirlər, İkinci Dünya müharibəsi