DOI: https://doi.org/10.36719/2706-6185/49/41-44
Təhminə Nəbiyeva
Gəncə Dövlət Universiteti
pedaqogika üzrə fəlsəfə doktoru
https://orcid.org/0009-0009-5789-4870
tahmina_nabiyeva@mail.ru
Kiçikyaşlı məktəblilərin qənaətcillik tərbiyəsinin mahiyyəti, məzmunu, prinsip və metodları
Xülasə
Tədqiqatın nəticəsində aydın oldu ki, kiçikyaşlı məktəblilərdə qənaətçilik iqtisadi tərbiyə – şagirdləri iqtisadiyyata aid bilik, bacarıq və vərdişlərlə silahlandırmaq, əməyə müsbət münasibət bəsləmək, şagirdlərə gündəlik davranışlarında qənaətcilliyi, işgüzarlığı, sahibkarlığı, zirəkliyi, iqtisadi dünyagörüş və baxışı aşılamaq, vətənin iqtisadiyyatına sadiq olmaq, mülkiyyətin qədrini bilmək kimi keyfiyyətləri mənimsətmək məqsədi ilə məktəbdə aparılan planlı, mütəşəkkil fəaliyyətdir. İqtisadi tərbiyə gəncliyə təşəbbüskar olmaq, yerinə yetirilən işə candərdi deyil, həvəslə, şüurla, könüllü olaraq yanaşmaq duyğuları aşılayır. Elmi-texniki, iqtisadi düşüncəni inkişaf etdirir. Qənaətcil olmağı, zirəkliyə sövq edir. Yarışa, rəqabətə, əmək bəhsləşməsinə yaxından qoşulmağı, özünü əsil mülkiyyətçi sanmağı və istehsalın sahibi olmaq hissini tərbiyə edir. Kiçikyaşlı məktəblilərin qənaətcillik tərbiyəsi şəxsiyyətin iqtisadi təfəkkürünün özül rolunu oynadığından onun bütün məktəblərdə sistemli və ardıcıl olaraq həyata keçirilməsinə nail olmaq vacibdir. Xüsusilə müvafiq sinifdənxaric və məktəbdənkənar tədbirlərin təsirli olmasına, bu tədbirlərin hazırlanması və keçirilməsində şagirdlərin özlərinin iştirakına geniş yer verilməlidir. Hər bir məktəbdə qənaət rejiminin tətbiqi, görülmüş işlərə qənaətlilik, sərfəlilik baxımından qiymət verilməsi həyata keçirilməlidir.
Açar sözlər: iqtisadi tərbiyə, uşaqların qənaətcillik tərbiyəsi, sosial-iqtisadi təsəvvür, iqtisadi bilik, milli tərbiyə ənənələri, işgüzarlıq, dəqiqlik