DOI: https://doi.org/10.36719/2663-4619/117/92-100
Nicat Əhədi
Azərbaycan Milli Aerokosmik Agentliyi
Doktorant
https://orcid.org/0009-0009-1450-0560
nicatehedi@gmail.com
Multispektral peyk təsvirləri əsasında Kəlbəcər rayonunun
yay otlaqlarında biokütlənin miqdarının hesablanması
Xülasə
Bu tədqiqat işində məqsəd, Kəlbəcər rayonunun yay otlaqlarında bitki örtüyünün vəziyyətini və otun biokütləsinin miqdarını peyk təsvirləri əsasında qiymətləndirməkdir. Araşdırmada Landsat 8-9 OLI TIRS peyk görüntülərindən istifadə edilmişdir. Vegetasiya dinamikasının təhlili üçün bitki örtüyü göstəricisi hesablanmış və onun biokütlə ilə əlaqəsi müəyyən edilmişdir. Biokütlənin hesablanması üçün bitki örtüyü göstəricilərinə əsaslanan empirik düstur tətbiq olunmuş və nəticələr CİS əsaslı proqram təminatında vizuallaşdırılmışdır.
Tədqiqat zamanı həmçinin ərazinin relyef xüsusiyyətləri də relyefin rəqəmsal modeli əsasında təhlil edilmiş, hündürlük və meyillilik kimi topoqrafik faktorlarla bitki örtüyü arasındakı əlaqələr araşdırılmışdır.
Aparılmış analizlər nəticəsində yaylaqların vegetasiya baxımından aktiv zonaları və nisbətən deqradasiyaya uğramış sahələri ayırd edilib. Bu nəticələr Kəlbəcər rayonunun yay otlaqlarının davamlı idarə olunması, otlaq yüklənməsinin tənzimlənməsi və ot örtüyünün qorunması baxımından əhəmiyyətli elmi baza rolunu oynayır.
Açar sözlər: Landsat 9 OLI TIRS peyk görüntüləri, yay otlağı, biokütlə, bitki örtüyü, relyefin rəqəmsal modeli