DOI: https://doi.org/10.36719/2706-6185/47/193-197
Cavid Haşımlı
Bakı Dövlət Universiteti
magistrant
https://orcid.org/0009-0006-6460-3056
hasimlicavid4@gmail.com
Qida bazarında qiymət tənzimlənməsi üzrə hüquqi
mexanizmlərin təkmilləşdirilməsi
Xülasə
Qida bazarı istənilən ölkənin iqtisadi və sosial sabitliyində mühüm rol oynayır. Bu bazarda qiymətlərin kəskin dəyişməsi, xüsusilə əsas ərzaq məhsulları üzrə süni bahalaşma və ya qıtlıq halları, əhalinin sosial rifahına və ərzaq təhlükəsizliyinə ciddi təsir göstərə bilər. Bu baxımdan, qiymət tənzimlənməsi üzrə hüquqi mexanizmlərin formalaşdırılması və təkmilləşdirilməsi dövlətin prioritet vəzifələrindən biridir. Məqalədə Azərbaycan Respublikasında qida bazarının hüquqi tənzimlənməsi sahəsində mövcud normativ-hüquqi baza təhlil olunmuş, tətbiq edilən qiymət siyasəti və onun icrasına nəzarət mexanizmləri araşdırılmışdır. Qanunvericilikdəki boşluqlar, müvafiq orqanlar arasında səlahiyyət bölgüsündəki qeyri-müəyyənliklər və nəzarət alətlərinin qeyri-effektivliyi mövcud problemlər sırasında göstərilmişdir. Eyni zamanda, beynəlxalq təcrübəyə əsaslanaraq qida məhsullarının qiymət sabitliyinin təmin edilməsində dövlət tənzimləməsinin optimal modelləri və mexanizmləri təqdim olunur. Bunlara vergi və subsidiyalaşma vasitələri, rəqabət mühitinin qorunması, inhisarçılıqla mübarizə və fövqəladə hallarda qiymət tavanlarının tətbiqi kimi tədbirlər daxildir. Sonda, mövcud hüquqi mexanizmlərin daha effektiv və şəffaf işləməsi üçün təkliflər irəli sürülür. Bu təkliflər çərçivəsində hüquqi aktların təkmilləşdirilməsi, institusional potensialın artırılması və ictimai nəzarətin gücləndirilməsi vacib amillər kimi vurğulanır. Məqalə, qida bazarındakı qiymət sabitliyinin təmin olunmasında hüquqi mexanizmlərin rolu və inkişaf istiqamətləri baxımından nəzəri və praktik əhəmiyyət daşıyır.
Açar sözlər: qida bazarı, qiymət tənzimlənməsi, hüquqi mexanizmlər, ərzaq təhlükəsizliyi, dövlət tənzimləməsi