İsgəndərzadə Aytən Murman qızı
Azərbaycan Dövlət Pedaqoji Universiteti
FƏNLƏRARASI İNTEQRASİYANIN REALLAŞDIRILMASINNIN ZƏRURƏTİ
Açar sözlər: təlim, riyaziyyat təlimi, inteqrasiya, ədəbiyyat təlimi, fənlərarası əlaqə.
Key words: education, teaching maths, integration, teaching literature, interdisciplinary relation.
Ключевые слова: обучение, обучение математике, интеграция, обучение литературе, межпредметные связи.
Tədris prosesində fəndaxili və fənlərarası inteqrasiyanın təmin edilməsi bilik və bacarıqların şagirdlər tərəfindən daha asan mənimsənilməsi, dərslərin daha maraqlı və məzmunlu təşkili, uşaqlarda tədqiqatçılıq, elmlilik meyillərinin inkişafı üçün çox vacib şərtdir.
Fənlərarası inteqrasiya bir neçə fənnə aid olduğu ortaq bilik və bacarıqların sintezi olmaqla yanaşı, bir fənnə aid anlayışların və metodların digər bir fənnin tədrisində istifadəsini nəzərdə tutur. Belə inteqrasiya müxtəlif fənlər arasında məntiqi əlaqələrin qurulmasına kömək edir. Bundan başqa, bu proses eyni bir bacarığın ayrı-ayrı fənlər vasitəsilə daha da təkmilləşdirilməsini təmin etmək məqsədilə təlim prosesinin keyfiyyətinin artırılmasına şərait yaradır. Fənlərarası və fəndaxili münasibətlərin, sadəcə, əlaqə deyil, inteqrasiya xarakteri daşıması bu münasibətlərin daha sıx və möhkəm olmasına, onun bütöv bir prosesə çevrilməsinə kömək edir. Müəllimlər pedaqoji prosesdə ondan daha səmərəli qaydada istifadə etmək imkanı qazanırlar. Bundan başqa, fənlərarası və fəndaxili inteqrasiya şagirdləri interaktiv öyrənməyə yönəldir, onların təbiət, cəmiyyət və insanlar haqqında qarşılıqlı əlaqələr şəraitində qurulmuş biliklərə yiyələnməsini stimullaşdırır.