Abbasova Türkan Feyruz qızı
Azərbaycan Dövlət Rəssamlıq Akademiyası
ƏLİ VERDİYEV YARADICILIĞINDA MƏİŞƏT JANRI
Açar sözlər: rəssam, məişət, janr, əsər, Əli Verdiyev, bədii
Key words: painter, way of life, genre, work, Ali Verdiyev, artistic
Ключевые слова:художник, быт, жанр, Али Вердиев, художественный
Əli Verdiyev yaradıcılığının yüksək bədii-məziyyətini özündə əks etdirən amillərdən biri də çəkdiyi əsərlərin mövzu və janr rəngarəngliyidir. Rəssamın yaradıcılığında yer alan məişət janrlı əsərlərinin də özünəməxsus bədii məziyyətləri vardır.
“Əgər şərti olaraq bu janr öz başlanğıcını neolit dövründəki qaya rəsmlərindən götürüb desək, onda onun bu günə kimi davam edən inkişafını uzun bir dövr hesab etmək olar. Sonradan təsviri sənətin aparıcı janrlarından olmaqla dünyada mövcud olan bütün cərəyanlarda sənətkarların davamlı olaraq tapındıqları bədii-estetik vasitəyə çevrilmişdir. Məişət səhnələrinin bilavasitə insanların gündəlik həyatı ilə sıx bağlı olması onun geniş yayılmasını şərtləndirmişdir. Çoxəsrlik Azərbaycan təsviri sənətində onun ən yaxşı nümunələrini həm qədim miniatürçülər (Sultan Məhəmməd, Məhəmmədi, Mir Seyid Əli və b.), həm də sonrakı dövrlərdə Usta Qənbər Qarabaği, M.Q.İrəvani, A.Hüseyni, B.Kəngərli, Ə.Əzimzadə, M.Abdullayev, V.Səmədova, Ə.Məmmədov, A.Cəfərov, B.Əliyev, N.Əbdürrəhmanov, A.Hacıyev və başqaları yaratmışlar” [1, 56].
Yuxarıda adlarını qeyd etdiyimiz görkəmli Azərbaycan rəssamlarının yaradıcılığında olduğu kimi Əli Verdiyevin də yaradıcılığında məişət mövzusunda yaradılmış kompozisiyalar özünəməxsusluğu ilə seçilir. Onun “Tikiş tikən qadın” (1965), “Bulaq suyu” (1986), “Buza satan” (1996), “Fayton dayanacağı” (1996), “İstanbul” (1996), “Kiçik bazar” (1997), “İstirahət” (1989), “Yatmış Aylin” (2003), “Restoran” (2003), “Park” (2004), “Ayna qarşısında” (1976), “Yeni binanın pəncərəsi” (1994), “Mətbəx” (1997), “Eyvan” (2011) kimi rəngkarlıq və qrafika əsərləri bu qəbildəndir.