Süleymanova Fatma Qoşqay qızı
Azərbaycan Dövlət Mədəniyyət və İncəsənət Universiteti
TAHİR SALAHOV YARADICILIĞINDA SƏNAYE MƏNZƏRƏSİ
Açar sözlər: rəssam, neft, əsər, rəngkarlıq, mənzərə, sənaye
Key words: artist, oil, painting, work, landscape, industry
Ключевые слова:Художник, нефть, произведение, живопись, пейзаж, индустрия
Tahir Salahov yaradıcılığında Xəzər dənizində çalışan neftçilərin obrazları, Neft daşları xüsusi yer tuturdu. Rəssamın sərt üslubun gözəl nümunələrindən sayılan “Neft Daşlarında” (1955), “Neft Daşları” (1956), “Növbədən qayıdarkən” (1957), “Səhər eşelonu” (1958), “Çənlər” (1959), “Çənlər parkı” (1959), “Təmirçilər” (1960) əsərlərini göstərmək olar. Yeni üslubda işlənmiş bu tabloları gənc rəssamı yalnız Azərbaycanda deyil, keçmiş SSRİ məkanının təsviri sənət aləmində böyük şöhrət gətirdi. Rəssam hər zaman ön planda sənaye mənzərəsini verir. Ancaq bununla belə rəssam obrazlı təfəkkürə əsaslanaraq özünün ən gözəl əsərlərini bədii ümumiləşdirmə yolu ilə canlandırır. Obrazlı təfəkkürə əsaslanan rəssamın əsərləri sırasına “Neft Daşlarında” əsərinin adını çəkə bilərik. Bu əsəri da həm rəng həlli, həm də kompozisiya xüsusiyyətlərinə görə xeyli maraq doğurur. Sovet dövrünün bu mövzuda yaradılmış əsərlərində əsas xüsusiyyət parlaq rəng, kulminasiyanın pafosu idi. T.Salahovu öz müasirlərindən fərqləndirən əsas cəhət və ustalığı o idi ki, rəssam qürub çağı Xəzəri və səmanı, gəmiləri və insan siluetlərini böyük məharətlə təsvir edirdi. Rəssam əsərlərində əsasən tünd və boğuq rənglərdən isitifadə etsə də bu cür hal izləyicidə mənfi hiss oyatmır.